Një 63-vjeçar ka ndërruar jetë mbrëmjen e sotme në Spitalin e Durrësit, pasi ishte shoqëruar në ambientet e sigurisë së Komisariatit.
Policia thotë se rreth orës 18:20 ka humbur jetën shtetasi Mehdi Guzina, banues në Shijak. Ai ndodhej i shoqëruar nga Policia, pasi ishte dënuar me 18 ditë burgim dhe pritej të transferohej për vuajtjen e dënimit në IEVP Lushnjë.
Ai ka shfaqur shqetësime shëndetësore dhe menjëherë është transportuar drejt Spitalit të Durrësit për ndihmë mjekësore, ku pavarësisht asistencës së dhënë nga personeli mjekësor, ka ndërruar jetë në sallën e reanimacionit.
Grupi hetimor, nën drejtimin e Prokurorisë, po vijon veprimet për sqarimin e plotë të rrethanave të ngjarjes.
