Një grup protestuesish nga zona e Rrjollit kanë sulmuar këtë të mërkurë godinën e Prokurorisë së Posaçme kundër Korrupsionit dhe Krimit të Organizuar (SPAK), duke hedhur vezë në drejtim të ndërtesës dhe duke paralajmëruar për radikalizim të protestave nëse kërkesat e tyre nuk merren në konsideratë.
Pas incidentit, policia ka nisur procedim penal në gjendje të lirë ndaj dy protestuesve, të identifikuar si Gezim Pjeshka dhe Nikoll Malaj.
Sipas njoftimit zyrtar të policisë, të dy shtetasit akuzohen për veprat penale “Prishja e qetësisë publike” dhe “Organizimi dhe pjesëmarrja në grumbullime e manifestime të paligjshme”, të parashikuara nga nenet 274 dhe 262 të Kodit Penal.
Aksioni para SPAK është prirë nga Partia Mundësia, e drejtuar nga Agron Shehaj, ndërsa protestuesit kanë kërkuar që SPAK të ndërhyjë për t’i kaluar tokat në zonën e Rrjollit.
Sipas tyre, toka u përket familjeve të tyre dhe është marrë në mënyrë të padrejtë nga Fatmir Shpellzaj, i cili sipas pretendimeve të tyre ka fituar në mënyrë të padrejtë vendimet gjyqësore të formës së prerë.
Protestuesit kanë deklaruar se do të shkojnë “deri në fund për amanetin e gjyshërve”, duke paralajmëruar përshkallëzim të protestave, ku vetëm pak ditë më parë u shprehën se do të ketë edhe gjakderdhje.
Nga ana tjetër, pronari aktual i tokës, Fatmir Shpellzaj, ka deklaruar se çështja është zgjidhur në gjykatë përmes dokumenteve ligjore dhe vendimeve të formës së prerë.
