Një lokal në Ksamil, i identifikuar si “Bumble Bee”, është djegur plotësisht rreth orës 03:10 të mëngjesit të sotëm. Sipas Policisë, lokali me konstruksion druri ishte marrë me qira nga shtetasi K. I., ndërsa grupi hetimor po punon për të zbardhur shkaqet dhe rrethanat e ngjarjes.
Ngjarja ka ngritur dyshime të forta për një lidhje të mundshme me konfliktin kriminal ku është përfshirë 42-vjeçari Ramadan Zoto, i njohur edhe si Ramadan Canaj. Ky i fundit akuzohet për plagosjen e dy personave më 17 korrik në Sarandë, të dy të afërm të të shumëkërkuarit Ervis Lami.
Dyshohet se pas plagosjes së dy miqve të Lamit saga e përplasjes vijoi duke ekzekutuar me eksploziv edhe Isuf Jacaj, babain e Klaus Jacaj, që ndihmoi Ramazan Canaj të largohet pas plagosjes së dy djemve nga Kamza.
Aktualisht, nuk ka të dhëna zyrtare që e lidhin zjarrin në Ksamil me sagën kriminale, por pista e hakmarrjes nuk përjashtohet, për shkak të përshkallëzimit të ngjarjeve në javët e fundit.
Njoftimi zyrtar i Policisë së Sarandës:
“Sarandë/ Rreth orës 03:10, në Ksamil, ka rënë zjarr dhe është djegur plotësisht një lokal me konstruksion druri, i marrë me qira nga shtetasi K. I.. Grupi hetimor po punon për zbardhjen e rrethanave të ngjarjes dhe të shkakut të rënies së zjarrit.”
