Gjilani është tronditur thellë nga një ngjarje e rëndë që ndodhi sot në mesditë, ku tre persona humbën jetën dhe një tjetër u plagos nga një sulm me armë zjarri. Ngjarja ndodhi rreth orës 12:32 në rrugën “Ibrahim Rrugova”, në një prej lagjeve kryesore të qytetit.
Sipas informacioneve zyrtare nga policia, autori i sulmit është Mefail Shkodra, 52 vjeç, i cili qëlloi për vdekje dy persona, Selami dhe Edmond Hasanin, babë e bir, të cilët njiheshin si argjendarë të njohur në Gjilan. Njëri prej të plagosurve, Abedin Hoxha, që është dhëndri i njërës prej viktimave, humbi jetën më pas në spital. Mefail Shkodra vazhdon të jetë në arrati dhe policia ka nisur një operacion të gjerë kërkimi për arrestimin e tij. Autoritetet kanë bërë thirrje për ndihmë nga qytetarët për të siguruar kapjen e tij sa më shpejt.
Përveç autorit kryesor, në kërkim janë shpallur edhe dy djemtë e tij, Edonis Shkodra, 22 vjeç, dhe Engjull Shkodra, 20 vjeç, të cilët dyshohet se janë përfshirë në ngjarje.
Mefail Shkodra nuk është një emër i panjohur për drejtësinë. Në qershor të vitit të kaluar, ai dhe i biri u arrestuan nën dyshimin e përfshirjes në aktivitetin e fajdeve, ku dyshohej se jepnin para me interes dhe më pas kërcënonin dhe shantazhonin viktimat e tyre. Pas katër muajsh paraburgim, Mefail Shkodra u lirua në tetor 2024, por duket se konflikti qëndron ende i pazgjidhur.
Në rrjetet sociale dhe në media po qarkullon gjithashtu një fotografi e tij bashkë me krerët më të lartë të shtetit, përfshirë kryeministrin në detyrë, Albin Kurti, dhe presidenten Vjosa Osmani, që ka ngjallur reagime të ndryshme në opinion.
Autoritetet dyshojnë se motivi i këtij krimi makabër lidhet me një konflikt të gjatë për fajde, që duket se eskaloi në këtë tragjedi të rëndë që ka tronditur jo vetëm qytetin e Gjilanit, por të gjithë vendin.
Policia ka njoftuar se hetimet po vazhdojnë intensivisht dhe ka apeluar për bashkëpunim maksimal nga qytetarët, duke theksuar rëndësinë e kapjes së autorëve për të parandaluar çdo incident të mëtejshëm.
