Ngjarja e rëndë që tronditi Tepelenën mëngjesin e 27 shtatorit vijon të zbulojë episode të reja dramatike. Viktima, 44-vjeçari italian Eduardo Sarchi, u vra me armë zjarri nga një distancë prej rreth 120 metrash në zonën e fshatit Salari, nga Kamber Sulçe, 48 vjeç, i cili ndodhet ende në arrati.
Ndërkohë që mësohet nga burime mediatike se gjithçka nisi pas një konflikti banal për dritat e gjata të automjeteve. Sulçe është përplasur verbalisht me Gazmend Braçin, djalin e ortakut të Sarchit, dhe më pas ka shpërthyer në agresion të armatosur.
Dëshmia tronditëse e të riut: “Na qëllonte nga larg, Eduardo u vra teksa po mbyllte derën”
Në dëshminë e dhënë për hetuesit, Braçi tregon se pas përplasjes me autorin, makina e tij kishte mbetur në rrugë pa karburant. Për ndihmë, ai kishte njoftuar të atin, i cili mbërriti bashkë me Sarchin në dy automjete të ndryshme.
“Në atë moment, Kamberi nisi të qëllonte në ajër dhe të shante nga larg. Në një moment nisi të shtinte në drejtimin tonë. Eduardo po mbyllte derën e makinës për të mos u bërë i dukshëm, kur u qëllua dhe ra në tokë. Ishte një moment paniku. Ne u shtrimë barkas dhe nuk lëvizëm derisa mbërriti policia,” ka rrëfyer Braçi.
Një tjetër dëshmitar që ndodhej në vendngjarje ka pohuar se sulmi zgjati mbi 20 minuta me ndërprerje të herëpashershme, duke krijuar një gjendje ankthi dhe frike mes të pranishmëve.
Autori i identifikuar nga kamerat – policia dyshon për bashkëpunëtorë
Falë pamjeve të kamerave të sigurisë dhe dëshmive të mbledhura, autoritetet kanë mundur të identifikojnë Kamber Sulçen si autorin e dyshuar të krimit. Mjeti i tij, një Ford i bardhë, është gjetur i braktisur mes fshatrave Nivicë dhe Bolenë, në territorin e Vlorës.
Policia dyshon se Sulçe ka marrë ndihmë nga persona të tjerë për t’u larguar menjëherë pas krimit, duke vështirësuar lokalizimin e tij. Hetimet janë intensifikuar në disa qarqe të jugut të vendit, ndërsa autoritetet po përdorin dronë dhe forca speciale për kontrollin e zonave të thella malore.
Apeli i familjes dhe autoriteteve italiane
Familja e biznesmenit italian ka mbërritur në Shqipëri dhe ka kërkuar drejtësi për vrasjen brutale të 44-vjeçarit, i cili kishte disa vite që operonte në fushën e turizmit dhe agrobiznesit në jug të Shqipërisë. Autoritetet italiane kanë shprehur interesim të lartë për hetimet dhe janë në kontakt të vazhdueshëm me Policinë Shqiptare.
