Policia shqiptare ka nisur hetimet në lidhje me vdekjen e Miklovan Danajt, i njohur edhe me emrin Keli, pas gjetjes së trupit të tij të pajetë në bregdetin e Marbellës, Spanjë, më 24 gusht të këtij viti.
Sipas autoriteteve spanjolle, dyshohet se Danaj është vrarë, ndërsa pranë trupit të tij janë gjetur dy dokumente identifikimi shqiptare. Hetimet në Spanjë janë përqendruar kryesisht në pistën e pazareve të drogës, duke sugjeruar se vrasja mund të jetë e lidhur me aktivitet kriminal ndërkombëtar.
Ndërkohë, edhe policia shqiptare ka ndërmarrë veprime hetimore në vend, përfshirë marrjen në pyetje të familjarëve të Danajt, si dhe verifikime për çdo informacion që ata mund të kenë mbi aktivitetin e tij jashtë vendit.
Burime pranë hetuesve bëjnë me dije se po kryhen gjithashtu verifikime në disa shtete europiane, përfshirë Italinë dhe Holandën, ku Danaj dyshohet se ka pasur kontakte apo veprimtari.
Një detaj shqetësues ka dalë në dritë disa javë para konfirmimit të vdekjes: familjarët e Danajt kanë marrë një telegram ku u bëhej me dije vdekja e tij dhe njëkohësisht u kërkohej të mos e kërkonin më.
Hetimet po vijojnë në bashkëpunim të ngushtë mes autoriteteve shqiptare dhe atyre spanjolle.
