Kanë dalë detaje të tjera lidhur me vrasjen e biznesmenit Edmond Mëhalla, e ndodhur më 30 nëntor pranë biznesit të tij. Sipas hetimeve, qitësi që kreu atentatin dyshohet të jetë shtetas i huaj, një pistë kjo e bazuar në analizimin e të dhënave dhe provave të administruara deri tani. Ende nuk është identifikuar ekzekutori, ndërsa hetimet vijojnë dhe pistat mbeten të hapura.
Në kuadër të hetimeve, policia ka arrestuar Nevzat Spahon, i cili dyshohet për bashkëpunim në vrasjen e biznesmenit. 29-vjeçari nga Prrenjasi ka precedent penal, duke përfshirë dënime për tentativë vrasjeje, armëmbajtje pa leje, shtrëngim me anë të kanosjes dhe vjedhje. Gjatë marrjes në pyetje, Spaho ka mohuar njohjen e autorit të atentatit dhe ka deklaruar se automjeti i përdorur gjatë ekzekutimit i është dorëzuar disa personave nga Lezha.
Po ashtu, për vrasjen janë shpallur në kërkim Marselo Arani dhe Armando Kola, të cilët dyshohen si bashkëautorë në ngjarje. Hetimet për identifikimin e autorëve dhe zbardhjen e plotë të rrethanave vazhdojnë intensivisht.
