Detaje të reja kanë dalë në dritë lidhur me arratisjen e të paraburgosurit Altin Ndoci nga spitali Infektiv i Durrësit. Bëhet me dije se gjatë vizitave mjekësore, Ndoci nuk ishte vetëm, por shoqërohej edhe nga një tjetër person i paraburgosur.
Për shoqërimin e dy të paraburgosurve ishin angazhuar pesë punonjës të Policisë së Burgjeve, tre për shoqërimin e drejtpërdrejtë dhe dy të tjerë qëndronin në një furgon të parkuar poshtë spitalit.
Sipas informacioneve, Ndoci kërkoi të shkonte në tualet dhe u shoqërua nga dy efektivë. Sapo doli, ai dyshohet se goditi dhe shtyu efektivët, duke përfituar nga situata për t’u larguar me shpejtësi.
Arratisja ka ndodhur nga kati i tretë i pavijonit infektiv, ndërsa autoritetet vijojnë hetimet për zbardhjen e plotë të rrethanave dhe përcaktimin e përgjegjësive.
