Është zbardhur dëshmia e Gazment Buçpapës, i arrestuar një ditë më parë për vrasjen e Egli Pashollarit. Ngjarja ndodhi në zonën e ish-Parkut të Autobusëve në Tiranë.
Buçpapa ka deklaruar se viktima e kishte ofenduar në sy të bashkëshortes së tij dhe i kishte bllokuar rrugën me makinë.
“Egli Pashollari më shau nga makina. I rashë borisë për hapjen e rrugës. Unë veprova në kushtet e vetëmbrojtjes,” ka thënë ai, duke shpjeguar arsyen pse përdori armën e ftohtë.
Buçpapa ka treguar edhe dinamikën e ngjarjes.
“Mora gruan në punë dhe u nisa për në spital, por gjeta rrugën e bllokuar. Unë i rashë borisë, por ai doli nga makina dhe më shau,” ka deklaruar i dyshuari.
Policia bëri me dije se Buçpapa është lokalizuar dhe arrestuar në banesën e tij në Tropojë. Ai akuzohet për veprat penale “vrasja me dashje” dhe “prodhimi, mbajtja, blerja apo shitja pa leje e armëve të ftohta”.
31-vjeçari Egli Pashollari u vra më 20 shkurt në rrugën “Kongresi i Lushnjës” në Tiranë. Bashkëshortja e Buçpapës, e cila punon në një market pranë vendit të ngjarjes, kishte raportuar më parë se Pashollari e ngacmonte, por sipas Buçpapës, konflikti nisi për shkak të bllokimit të rrugës dhe ofendimeve.
Sipas hetimeve, Buçpapa, bashkë me gruan dhe një person tjetër, janë konfliktuar me Pashollarin, duke e goditur me thikë për vdekje. Pas ngjarjes, ata larguan trupin me makinë, e më pas morën taksi për të shkuar në banesën e tyre në zonën e Sharrës, ku Buçpapa më pas u arratis.
