Deputeti i Partisë Socialiste, Tërmet Peçi, ka dalë sot nga SPAK pas një qëndrimi prej rreth një ore, pa dhënë asnjë koment për arsyen e thirrjes por edhe përse ecte me vështirësi. I vetmi reagim i tij ka qenë një përshëndetje e shkurtër “të fala Ristanit”.
Reagimi i tij lidhet me një kallëzim penal të depozituar në SPAK nga Arben Ristani në prill 2025, i cili akuzon deputetin dhe drejtorin e bashkisë së Tepelenës, Lorenc Bami, për ngritjen e një skeme të mirëfilltë korrupsioni. Sipas kallëzimit, Bami ka krijuar përmes bashkëshortes kompaninë “NG STRUCTURES”, e cila ka përfituar tendera në Tepelenë dhe Gjirokastër me një vlerë që arrin deri në 66 milionë euro, veçanërisht në projektet e rindërtimit.
Kallëzimi përmend edhe kompaninë “IUMENTIS shpk”, që ka përfituar tokë publike dhe leje për thertoren rajonale, duke kaluar më pas paratë tek kompania e drejtorit të bashkisë.
Në dosje gjithashtu thuhet se në vitin 2019 Bami ka krijuar kompaninë “Artreum Generation”, përmes së cilës ka marrë nënkontraktime të tjera, përfshirë një tender të ujësjellësit në Memaliaj. Sipas kallëzimit, Peçi ka favorizuar edhe motrën e tij, duke i dhuruar mijëra metra katrorë tokë publike për një agroturizëm në fshatin Rexhin, i financuar me rreth 1 milion euro nga fondet IPARD të administruara nga Frida Krifca.
SPAK nuk ka dhënë ende detaje mbi qëllimin e thirrjes dhe hetimet në vijim.
