Gjykata e Posaçme dënoi me 15 vite burgim Moisi Habilaj, kreun e grupit kriminal Habilaj. Ai u cilësua fajtor për akuzat e “Trafikimit të narkotikëve”, kryer në bashkëpunim, në formën e veçantë, atë të grupit të strukturuar kriminal në disa episode gjatë viteve 2013-2015, si dhe për pjesëmarrje në grup të strukturuar kriminal. Për shkak të gjykimit të shkurtuar, dënimi u reduktua në 10 vite burgim.
Nezar Seiti, i konsideruar si financieri i grupit Habilaj, u dënua për të njëjtat akuza me 12 vite burgim, por për shkak të gjykimit të shkurtuar dënimi u ul në 8 vite.
Për të pandehurit Fatmir Minaj dhe Maridian Sulaj alias Meridian Sulaj, gjykata e Posaçme vendosi të pushojë çështjen penale.
Në lidhje me grupin kriminal dhe favorizimin në trafikun e drogës, është akuzuar edhe ish-ministri i Brendshëm, Saimir Tahiri. Ky i fundit është dënuar vetëm për shpërdorim të detyrës dhe pret shqyrtimin e çështjes nga Gjykata e Lartë. Dosja e Tahirit ka qenë ndër më të bujshmet, të paktën 7 vite më parë. Ai la mandatin e deputetit në momentin që Prokuroria për Krime të Rënda e kohës celi hetimin penal ndaj tij.
