Automjeti i tij ishte i pajisur me gjurmim gjeolokimi,por kur në agimin e së martës, më 20 janar, u ndërmor operacioni për arrestimin e tij, 47-vjeçari kishte humbur çdo gjurmë.
Ervin Dakoli, 47-vjeçar shqiptar, i konsideruar nga DDA e Bolonjës si një narkotrafikant i fuqishëm aktiv në trafikun e lëndëve narkotike drejt Italisë, por edhe drejt Francës dhe Spanjës, ka arritur t’i shpëtojë kapjes. Ai dyshohet të jetë në krye të organizatës kriminale me bazë në Reggio Emilia, e goditur të martën nga nëntë masa sigurie të lëshuara nga gjyqtari hetues i Bolonjës me kërkesë të DDA-së. Shtatë masa janë ekzekutuar, por ende mungojnë Dakoli — i cili ndodhej në Shqipëri — dhe një tjetër i arratisur me bazë në Francë.
Agjentët e Squadra Mobile të Policisë së Reggio Emilia, të koordinuar nga Shërbimi Qendror Operativ i Drejtorisë Qendrore Antikriminale dhe të mbështetur nga Divizioni i Tretë i Shërbimit të Bashkëpunimit Ndërkombëtar të Policisë së Drejtorisë Qendrore të Policisë Kriminale, në bashkëpunim me Zyrën e Ekspertit për Sigurinë në Shqipëri, e kishin ndjekur prej muajsh në Shqipëri, në qytetin e Kavajës. Automjeti i tij ishte i lokalizuar me GPS, por në momentin që u ndërmor aksioni për arrestimin, 47-vjeçari kishte zhdukur çdo gjurmë. Dyshimi se dikush në vendlindje e ka paralajmëruar për urdhrin e arrestit që rëndonte mbi të, tashmë është më shumë se një hipotezë.
15 persona nën hetim
Operacioni “Sturl One” ka çmontuar një bandë ndërkombëtare narkotrafikantësh shqiptarë: gjithsej janë nën hetim 15 persona, nga të cilët nëntë (tetë shqiptarë dhe një italian) janë subjekt i urdhrave të arrestit. Arrestime dhe kontrolle janë kryer, përveçse në provincat italiane Reggio Emilia, Bergamo, Brescia dhe Savona, edhe në Francë, Spanjë dhe Shqipëri, falë një koordinimi operacional me autoritetet policore të huaja, veçanërisht me Departamentin e Policisë Kriminale Shqiptare.
Anëtarët e bandës, sipas hetimeve, përdornin “telefona të enkriptuar” për të shmangur përgjimet dhe lëviznin në gjysmën e Italisë sasi të mëdha kokaine dhe para të gatshme. Në krye të organizatës ishte pikërisht Dakoli, aktiv në Emilia-Romagna, i cili importonte në Itali sasi të mëdha kokaine, marijuane dhe hashashi nga Amerika e Jugut, Europa Veriore dhe Spanja, duke i fshehur brenda kamionëve me fruta dhe perime, për t’i shpërndarë më pas në territorin kombëtar me ndihmën e një rrjeti të gjerë korrierësh.
Platforma e enkriptuar “Skyecc”
Për të komunikuar në mënyrë të sigurt mes tyre, të dyshuarit përdornin platformën e enkriptuar “Skyecc”, të instaluar në pajisje telefonike specifike me vlerë mijëra euro secila. Dy prej këtyre aparateve, të sekuestruara në operacione të mëparshme, i dhanë një shtysë të re hetimeve, duke çuar në vitin 2022 në hapjen e një dege të re hetimore.
Nga monitorimi i bisedave të të dyshuarve, hetuesit kanë konstatuar se brenda vetëm gjashtë muajsh organizata ka qenë në gjendje të transportojë, menaxhojë dhe shpërndajë mbi 200 kilogramë kokainë dhe 1.000 kilogramë hashash dhe marijuanë, me përfitime të paligjshme që tejkalojnë një milion euro.
