Paraburgimi dhe përdorimi i masave alternative të sigurisë u vendosën në qendër të një tryeze dialogu të organizuar në Tiranë nga Zyra e Këshillit të Evropës, ku morën pjesë edhe përfaqësues të Shoqatës së Prokurorëve.
Takimi, me temë “Paraburgimi, Sfidat dhe Masat Alternative”, u zhvillua në kuadër të projektit për forcimin e kapaciteteve të gjyqësorit për zbatimin e standardeve të së drejtës për liri dhe siguri në Shqipëri.
Sipas të dhënave zyrtare të publikuara në raportet vjetore të Prokurorit të Përgjithshëm, masa e arrestit në burg kërkohet nga prokurorët për rreth 19–20% të të pandehurve që janë në hetim.
Në shumicën dërrmuese të rasteve – rreth 98% – kërkesat për arrest në burg depozitohen në gjykatë pas arrestimeve në flagrancë ose ndalimeve të kryera nga Policia Gjyqësore. Ndërsa vetëm në 2% të rasteve, prokurorët kërkojnë arrest në burg për persona që fillimisht janë hetuar në gjendje të lirë dhe për të cilët gjatë hetimeve vlerësohet se paraburgimi është i nevojshëm.
Prokurorët theksojnë se arresti në burg kërkohet kryesisht për persona të akuzuar për krime të rënda kundër jetës, shëndetit, pronës, familjes, sigurisë dhe rendit publik. Në këto raste, sipas tyre, masat alternative shpesh konsiderohen të papërshtatshme, veçanërisht në rastet e dhunës në familje, ku ekziston rreziku i përsëritjes së veprës penale.
Gjatë tryezës u theksua gjithashtu nevoja për studime më të thelluara mbi përdorimin e paraburgimit, analizimin e kohëzgjatjes së tij në faza të ndryshme të procedimit penal, si dhe për vlerësimin e efektivitetit të masave alternative.
Një tjetër shqetësim lidhet me mungesën e kapaciteteve dhe pajisjeve për mbikëqyrjen elektronike, çka e bën të vështirë zbatimin e plotë të masave alternative ndaj paraburgimit.
Shoqata e Prokurorëve u shpreh se mbetet e angazhuar për të kontribuar në analiza dhe studime që synojnë një sistem drejtësie më efikas dhe respektimin maksimal të të drejtave dhe lirive themelore të njeriut.
