Në Gjykatën e Posaçme u zhvillua seanca e radhës ndaj Kristin Shkrelit, kryetar i Bashkisë së Vaut të Dejës, i cili akuzohet për korrupsion në zgjedhje.
Gjatë seancës së të martës, u dëgjuan disa dëshmi dhe pati debate mes avokatëve të Shkrelit me SPAK.
Dëshmitari Anton Lumi
Dëshmitari Anton Lumi tha para gjykatës se nuk e njeh kryebashkiakun dhe tregoi detyrat e tij si elektricist për linjat elektrike në fshatrat e Shkodrës. Sipas tij, ky proces po bëhet qesharak sepse sipas saj kryebashkiaku nuk ka kryer asnjë krim për sa kohë u ka ofruar mbështetje banorëve për nevojat e tyre, ndërsa investimi është kryer nga OSHEE.
SPAK bëri kundërshtim të dëshmisë së Lumit gjatë seancës.
“Dëshmitari ka dhënë tjetër deklaratë gjatë hetimit paraprak”, deklaroi prokurori Dritan Prençi.
Dëshmitari Prek Kotaj
Prokuroria: A jeni ju në dijeni për ndonjë remont të këtyre linjave në fshatin Stajkë. Në maj 2026 kanë qenë zgjedhjet, a mund ta lidhni nëse keni punuar para apo pas zgjedhjeve?
Kotaj: Nuk e mbaj mend hiç. Mua më çoi shefi im Jetmir Deda për të shtruar një kabllo, tetori ka qenë fillimi i punës. Aty kishte dhe vendalinj dhe të OSHEE, kishte edhe elektricistë të tjerë.
Prokuroria: Ju çfarë pune do bënit?
Kotaj: Do shtrija kabllo.
Prokuroria: Çfarë problematikash kishte kjo linjë?
Kotaj: Nuk e di, nuk kam dijeni.
Avokatët: Kush ju urdhëroi juve të punoni për remont në fshatin Stajkë?
Kotaj: J. Deda.
Avokatët: Kjo është rutinë?
Dëshmitari: Po, po.
Avokatët: Kristjan Shkrelin a e njeh?
Dëshmitari: As e njoh, as kam folur me të.
Avokatët: Duke qenë se prokurori pyet a ka shtrirë apo jo kabllin, dhe ky proces u bë me shtrirje kablli, unë s’kam pyetje tjetër për dëshmitarin.
Dëshmitari Kastriot Gavoci
Prokuroria: Dëshmitar, ku punoni?
Gavoci: Punoj pranë Bashkisë së Vaut të Dejës prej tetë vitesh, punoj si shofer.
Prokuroria: A mund të dëshmoni nëse keni punuar apo jo në një linjë elektrike të fshatit Stajkë, Vau i Dejës, qoftë hapje apo mbyllje gropash apo vendosje shtyllash?
Gavoci: Ndërmarrja jonë është vetëm për rrugë e kanale.
Prokuroria: A jeni në dijeni për linja elektrike?
Gavoci: Merr në telefon kryeplaku dhe thotë se është problem rruga. Unë jam banor i fshatit Stajkë dhe telat bien rrugës. Si fshat është zonë e madhe, është e hapur. Janë bërë rrugë, investime, nuk e di se kur janë bërë këto investime.
Prokuroria: Nëse ju orientoj me zgjedhjet e 11 majit, janë bërë para apo pas zgjedhjeve?
Gavoci: S’e mbaj mend, për Zotin.
Avokatët e Shkrelit: Cilat janë detyrat e tua?
Gavoci: Jam katunar dhe puna ime është të bëj kujdes, të punoj, mos me pi.
Avokatët: Mos me pi?
Gavoci: O zonjë, s’duhet me pi kur jam në punë.
Avokatët: A keni pasur probleme me energjinë elektrike?
Gavoci: Vazhdojmë të kemi probleme me energjinë elektrike, ik e eja, na thonë se do bëhet remont.
Avokatët: Po rruga?
Gavoci: Ata e kanë të shtruar, ua ka bërë firmë private, janë të kënaqur.
Gjatë seancës, SPAK kundërshtoi dëshminë në gjykatë të Gavocit, sepse ka dhënë një tjetër dëshmi gjatë hetimeve. Dëshmitari është shprehur se: “Më telefonoi drejtori im që të shkoja për shtyllat, pashë gropat e hapura dhe kujtoj se shtyllat vendoseshin me vinç dhe unë me fadromë bëja mbylljen e tyre”.
Pasi dëgjoi dëshmitë, GJKKO vendosi ta shtyjë procesin ndaj Shkrelit për në datë 19 maj.
