Një debat i tensionuar është regjistruar mbrëmjen e djeshme në emisionin “Opinion”, gjatë një përplasjeje mes gazetares Klodiana Lala dhe Jamarbër Malltezit.
Debati u zhvillua në kuadër të diskutimit për çështjen “Partizani”. Gjatë emisionit, Lala theksoi se sot pyetja kryesore për opinionin publik është nëse Sali Berisha ka kryer korrupsion dhe nëse ai ka vënë institucionet në shërbim të dhëndrit të tij. Sipas saj, një tjetër pikë që kërkon përgjigje është mënyra se si u pasurua Jamarbër Malltezi. Ndërkohë, lidhur me kryeministrin Edi Rama, të gjithë të ftuarit në panel u shprehën se ai duhet të ishte pyetur më herët nga SPAK.
Debati u tensionua në momentin kur Lala ndërhyri gjatë fjalës së Malltezit, ndërsa ky i fundit reagoi duke thënë:
“Kur të mbarojë zhurmuesi, do të vazhdoj.”
Gazetarja i kërkoi menjëherë të ruante etikën në komunikim.
“Ju lutem, ruani etikën”, u shpreh Lala.
Malltezi reagoi duke e akuzuar se po e ndërpriste:
“Që nga momenti që më ndërpret fjalën, nuk po tregoni aspak etikë.”
Më pas gazetarja reagoi ashpër ndaj gjuhës së përdorur, duke theksuar se nuk pranonte fyerje.
“Unë nuk ju drejtohem kurrë me fjalë fyese dhe nuk pranoj, si nënë e dy fëmijëve, të më ofendoni. Tregoni respekt, sepse unë nuk ju kam ofenduar. Jam gazetare dhe po kërkoj llogari nga dhëndri i një personi që ka qeverisur këtë vend për 8 vite. Fyerjet tërhiqini mbrapsht, sepse nuk ju shkojnë as me statusin e pedagogut. Këtu e mbyll,” deklaroi Lala.
