Gjykata e Posaçme cakton masën e sigurisë “arrest me burg” edhe për inspektorin tjetër të IMT Klajdi Zhilla, i cili dyshohet për veprën penale të korrupsionit.
Burimet nga seanca thanë se Klajdi Zhilla dhe avokati i tij Andi Skënderi kanë mohuar akuzat. Zhilla pretendon se nuk ka qenë në dijeni të pazarave që janë bërë për subjektin në fjalë. Ai deklaron se atë ditë ai ka qenë me shërbim në një tjetër subjekt i cili ishte planifikuar për prishje. Të nesërmen ai pretendon se ka shkuar në një lokal me porosi të kolegut të tij Gerald Fuçia për të marrë një porosi.
Sipas avokatit, edhe transkriptet dhe fabula e organit të akuzës është ndërtuar gabim.
Zhilla u vetëdorëzua disa ditë pas operacionit të policisë dhe SPAK. Të shtunën GJKKO la në burg edhe punonjësin tjetër të IMT-së Gerald Fuçia. Të dy dyshohen se morën ryshfet 1 mijë euro për mos heqjen e një tende. Paratë e ryshfetit tentuan t’i fshihnin në lokalin në pronësi të ish-deputetit Mark Frroku. Për rrjedhojë është në hetim banakieri i lokalit dhe një inspektor tjetër i IMT-së.
