Prokuroria federale ka kërkuar burgim të përjetshëm për Franc Çopja, i shpallur fajtor të premten nga Gjykata e Asizave në Bruksel për urdhërimin e vrasjes së Ardit Spahiut, si dhe për drejtimin e një organizate kriminale. Prokurorët kërkuan gjithashtu që ai të vihet në dispozicion të Tribunalit për Zbatimin e Dënimeve për një periudhë minimale prej pesë vitesh.
Sipas akuzës, nuk ekzistojnë rrethana lehtësuese që mund të njihen në mënyrë legjitime për Franc Çopjan. Gjatë fazës përfundimtare të gjyqit gjashtëjavor, i zhvilluar në ndërtesën Justitia, prokurorët e përshkruan atë si “trurin” pas ndërmarrjes kriminale që çoi në vrasjen e kryer më 27 nëntor 2020 në Molenbeek.
Prokurorja Nathalie Franco paraqiti një portret të ashpër të të pandehurit, duke përmendur tipare si “inteligjencë strategjike, natyrë manipuluese dhe të rrezikshme, mungesë të plotë empatie, rrezikshmëri ekstreme dhe një mentalitet pushtues e kriminal”.
Sipas saj, Çopja kërkohet në Shqipëri për disa vepra të rënda penale, megjithëse në Belgjikë nuk ka dënime të mëparshme.
33-vjeçari ndodhet në paraburgim në Belgjikë që prej 29 dhjetorit 2023, pas ekstradimit nga Emiratet e Bashkuara Arabe. Me origjinë nga Shqipëria, ai u largua nga vendlindja në moshën 16-vjeçare për të punuar në Itali, përpara se të zhvendosej në Dubai në vitin 2019. Atje u përfshi në trafikun e drogës dhe u lidh me një “luftë klanesh” mes familjeve shqiptare.
