Pasditen e sotme është shënuar një grabitje me armë zjarri në një pikë karburanti në Fushë-Krujë. Autori i dyshuar, i cili drejtonte një taksi, ka kërcënuar me armë punonjësit e karburantit, duke u marrë paratë e xhiros ditore.
Sipas informacioneve zyrtare, i riu është identifikuar dhe shpallur në kërkim nga policia, ndërsa dyshohet se ka kryer dy vjedhje brenda pak orëve.
Fillimisht, ai ka marrë një taksi në Tiranë, duke i kërkuar shoferit që ta dërgonte në Fushë-Krujë. Në afërsi të Tapizës, i riu ka kërcënuar taksistin dhe ka marrë vetë drejtimin e mjetit, ndërsa shoferin e ka lënë në një zonë të largët, duke i marrë paratë dhe telefonin celular.
Më pas, me automjetin e grabitur, autori është drejtuar pranë një pike karburanti në afërsi të Milotit, ku nën kërcënimin e armës së zjarrit u ka marrë punonjësve paratë e xhiros ditore.
Pas grabitjes, i riu ka braktisur mjetin e vjedhur pranë një xhamie në Fushë-Krujë dhe është larguar, duke humbur gjurmët. Policia vijon kontrollet për kapjen e tij dhe zbardhjen e plotë të ngjarjes.
