Banorët e fshatrave Taç i Sipërm dhe Prodan, në zonën e Ersekës, kanë protestuar këtë të enjte kundër zaptimit të kullotave, të cilat ata pretendojnë se janë në pronësi dhe përdorim të dy komuniteteve.
Sipas banorëve, sipërfaqe të konsiderueshme kullotash janë përvetësuar nga një individ i vetëm, i cili dyshohet se ka marrë në zotërim mbi 400 hektarë tokë. Ata shprehen se këto sipërfaqe pritet të përdoren për instalimin e paneleve fotovoltaike.
Banorët theksojnë se ky veprim i dëmton rëndë ekonomikisht, pasi blegtoria përbën burimin e vetëm të të ardhurave për familjet e tyre. Rreth 100 blegtorë nga të dy fshatrat preken drejtpërdrejt nga kjo situatë, duke rrezikuar vazhdimësinë e aktivitetit blegtoral.
Protestuesit i bëjnë thirrje organeve ligjzbatuese dhe institucioneve përgjegjëse të ndërhyjnë për të verifikuar dhe rishikuar dokumentacionin e pronësisë. Sipas tyre, ekzistojnë mbivendosje në hartat e truallit, të cilat kanë çuar në përfshirjen e padrejtë të kullotave që prej vitesh përdoren për kullotjen e bagëtive.
Banorët kërkojnë zgjidhje të menjëhershme dhe rikthimin e kullotave në përdorim të tyre, duke paralajmëruar se, nëse nuk do të ketë reagim institucional, protestat do të vijojnë.
