Në një operacion të zhvilluar në lagjen San Fruttuoso, Policia e Shtetit arrestoi një 40-vjeçar me shtetësi shqiptare, i cili u kap në flagrancë teksa po dorëzonte kokainë në banesën e një klienti. Pas një sërë hetimesh dhe vëzhgimesh nga skuadra mobile, u konstatua se i arrestuari kishte ngritur një aktivitet të qëndrueshëm shpërndarjeje droge, duke ofruar në disa raste edhe shërbim “delivery”.
Gjatë një vëzhgimi pranë banesës së tij, policia e ndoqi 40-vjeçarin nga momenti kur hipi në autobus me një pako në dorë, deri në një pallat në San Fruttuoso. Sapo ai trokiti në derën e apartamentit ku dyshohej se do të kryhej shitja, ndërhyri policia. Në përpjekje për t’u shpëtuar forcave të rendit, ai tentoi të hidhte paketën brenda banesës, por droga u sekuestrua. Brenda saj u gjetën mbi 40 gramë kokainë. I arrestuari, i njohur më parë për precedentë penalë, u dërgua në burgun e Marassit, në dispozicion të autoriteteve gjyqësore.
