Pas betimit zyrtar në krye të Policisë së Shtetit, drejtori i ri, Skënder Hita, mbajti fjalimin e tij të parë, ku theksoi përgjegjësinë e lartë që merr me këtë detyrë.
“Betohem për të mbajtur me nder flamurin e Policisë së Shtetit. Betohem!”, u shpreh ai gjatë ceremonisë, ku ishin të pranishëm ministra dhe zyrtarë të lartë, përfshirë ministrin e Brendshëm, Besfort Lamallari.
Hita e cilësoi ditën e betimit si një moment të rëndësishëm në karrierë, duke theksuar se ka nderin të drejtojë institucionin më të lartë të rendit në vend. Ai falënderoi kryeministrin dhe qeverinë për besimin, si dhe shprehu mirënjohje për efektivët e policisë që shërbejnë çdo ditë në terren.
Drejtori i ri u zotua se sfida kryesore do të jetë rritja e besimit të qytetarëve dhe thellimi i rezultateve, duke deklaruar një luftë të pakompromis ndaj korrupsionit, sidomos brenda radhëve të policisë.
“Forcimi i rendit dhe sigurisë në të gjithë territorin e vendit janë misioni im”, theksoi Hita.
Gjatë ceremonisë, ministri i Brendshëm i la drejtuesit të ri tre mesazhe të qarta: Forconi profesionalizimin në çdo hallkë të policisë. Thelloni luftën kundër paligjshmërisë.Garantojeni që Policia të mbetet gjithmonë në shërbim të qytetarëve dhe jo mbi ta
