Ka dështuar seanca e parë paraprake për kryebashkiakun e Shkodrës, Benet Beci, dhe gjashtë të pandehurit e tjerë, të akuzuar nga SPAK për shkelje të barazisë në tendera. Beci nuk u paraqit në seancë, ndonëse ligji e përcakton si të detyrueshme praninë e tij, ndërsa arsyet e mungesës nuk ishin të qarta për gjykatën. Kujtojmë se më herët ai e kishte shmangur paraqitjen në SPAK për dy herë radhazi, gjatë fazës së komunikimit të akuzës.
Gjyqtarja Marinela Osmani vendosi shtyrjen e seancës për më 11 shkurt, në orën 11:00. Në këtë seancë, SPAK pritet të lexojë kërkesën për kalimin e çështjes në gjykim, ndërsa mbrojtja do të paraqesë kundërshtimet e saj. Mes të pandehurve është edhe Adela Ruko, bashkëshortja e ish-drejtorit të përgjithshëm të Autoritetit Rrugor Shqiptar, Evis Berberi, i cili ndodhet në arrest.
Sipas SPAK, Benet Beci ka shkelur barazinë mes operatorëve ekonomikë në një tender konsulence të zhvilluar nga KESH në vitin 2019, me objekt “Zhvillimi Strategjik i Sektorit Energjetik” dhe me vlerë 96.5 milionë lekë. Hetimi është nisur kryesisht mbi bazën e referimit të akteve nga hetuesit e Byrosë Kombëtare të Hetimit (BKH), pas sekuestrimit të provave materiale në banesën e Evis Berberit.
