Banorët e fshatrave Tërovë dhe Pendavinj kanë zhvilluar ditën e sotme një protestë për shkak të cilësisë së ujit të pijshëm, i cili prej dy javësh sipas tyre ka një erë shumë të rëndë dhe është i papijshëm për konsum. Ata shprehen se kjo situatë e bën të pamundur përdorimin e ujit edhe për gatim.
“Kemi 3 javë që kemi probleme me ujin e pijshëm. Është problem i vështirë që nuk i japim dot zgjidhje. Burimi është bërë në vitin 1977, mbase shkak janë reshjet e shumta. Banorët kanë blerë ujë, çfarë të bëjmë?”, është shprehur një banor.
Banorët e Tërovës dhe Pendavinjit, të cilët së bashku janë rreth 1,500 persona, kanë qenë të detyruar të blejnë ujë për konsum, duke rritur ndjeshëm shpenzimet e tyre. Një tjetër banor i moshuar shprehu shqetësimin për ndikimin që ka kjo situatë në jetën e përditshme.
“Po bën dy javë me aromë të keqe, e për të gatuar blejmë. E vështirë për çdo gjë. E rrobat kur i lajmë, janë me aromë të keqe. Ujë kemi, kemi 24 orë, por ka 15 ditë që ka erë të rëndë, nuk pihet. Këta që janë kompetentë ta gjejnë zgjidhjen. Po blemë ujë, kosto për ne janë shumë të larta. Me pensione jemi, vetëm pleq kemi ngelur. Nuk kemi nga ja mbajmë.”
