Banorë të fshatit Baks-Rrjoll në Shkodër u mblodhën pranë Drejtorisë Vendore të Policisë, duke kërkuar lirimin e disa prej banorëve të shoqëruar gjatë protestave për pronat. Protestuesit akuzojnë institucionet për padrejtësi në çështjet e pronësisë dhe kërkojnë zgjidhje të menjëhershme.
Njëri prej tyre deklaroi se banorët janë trajtuar në mënyrë të padrejtë dhe se nuk do të ndalen deri sa të fitojnë të drejtën e tyre, duke përmendur edhe mundësinë e ndjekjes së çështjeve në gjykata dhe në SPAK.
“Na arrestojnë te toka, shkojnë atje sikur ua kemi zënë ne. Ne do të vijmë nesër, e pasnesër, pasi jemi në të drejtën tonë. Këta kriminelë na trajtojnë se u kemi zënë ne tokat. Na bllokojnë makinat, kanë falsifikuar dokumentet. Nuk do të ndalemi, dhe do ta mbrojmë me çdo mënyrë. Do t’i drejtohemi gjykatave, SPAK-ut. I kapin prej leckash, nuk pyesin nëse janë pleq apo të rinj. Nuk është shteti që kemi ne, por ata që kanë paguar.”
Një tjetër protestues nuk i kurseu lotët, duke theksuar se banorët nuk do të ndalen deri sa të fitojnë të drejtën e tyre mbi pronat.
Situata mbetet e tensionuar, ndërsa banorët vazhdojnë të kërkojnë përgjigje konkrete nga autoritetet për pretendimet e tyre.
