Banorët e Rrjollit në Velipojë kanë protestuar sërish sot, pasi pretendojnë se po u grabiten pronat për ndërtimin e një resorti turistik. Ata janë përplasur me forcat e policisë që ndodheshin në zonë, ndërsa fillimisht kanë bllokuar aksin rrugor Velipojë–Shëngjin në shenjë proteste.
Më pas, banorët kanë ndërhyrë në vendin e punimeve, duke nxjerrë jashtë makineritë dhe punonjësit e kompanisë që kishte nisur punën për projektin. Si pasojë e reagimit të tyre, punimet janë pezulluar për momentin.
Sipas banorëve, nisja e punimeve është e paligjshme, pasi çështja e pronësisë ende nuk është zgjidhur. Ata theksojnë se në ditët në vijim pritet të zhvillohet edhe një seancë gjyqësore, e cila do të vendosë për pronën, duke kërkuar që çdo punim të ndalet deri në marrjen e një vendimi përfundimtar.
