Ndërtimi i një fabrike në fshatin Kolsh të Kukësit ka nxitur reagimin e banorëve, të cilët kanë dalë në protestë duke kërkuar më shumë transparencë mbi projektin. Ata shprehen se nuk janë informuar për funksionin e fabrikës dhe ngrejnë shqetësime serioze mbi ndikimin që mund të ketë në shëndetin e tyre dhe mjedisin përreth.
Sipas banorëve, ende nuk është bërë e qartë nëse objekti do të shërbejë për përpunimin e hekur-nikelit apo për trajtimin e mbetjeve spitalore. Vendndodhja e fabrikës pranë zonave të banuara është një tjetër pikë shqetësimi, që sipas tyre përbën rrezik të drejtpërdrejtë për komunitetin lokal.
Banorët pretendojnë gjithashtu se po ushtrohet presion nga ana e Bashkisë Kukës për të firmosur dokumente që shprehin miratimin e tyre për ndërtimin, pavarësisht mungesës së informacionit zyrtar.
Nëse autoritetet nuk ofrojnë transparencë të plotë dhe nuk marrin parasysh shqetësimet e tyre, banorët paralajmërojnë përshkallëzim të protestave dhe ndjekje të rrugëve ligjore për të ndaluar punimet.
