Banorët e Durrësit dolën këtë të mërkurë në protestë, një ditë pas përmbytjeve që përfshinë disa zona të qytetit, ku shumë banesa vijojnë të jenë nën ujë. Ata kërkojnë dëmshpërblim për dëmet e shkaktuara nga përmbytjet, ndërsa shprehin pakënaqësi për mungesën e ndihmës dhe vlerësimit nga institucionet.
Një banor i ish-Kënetës tha se është hera e tretë që oborri i banesës së tij përmbytet dhe se këtë herë uji ka hyrë brenda në shtëpi.
“Uji nuk po tërhiqet. Të heqin ujin nga rrugicat dhe banesat sepse dëmet janë shumë të mëdha. Askush nuk ka ardhur nga grupet e verifikimit për të parë situatën. Jemi të izoluar dhe nuk po na ndihmon askush” u shpreh ai.
Banorët kërkojnë që shteti të ndërmarrë masa të menjëhershme dhe të mos i trajtojë qytetarët si “dorë të dytë”, duke u siguruar mbështetje dhe dëmshpërblim për humbjet e shkaktuara nga përmbytjet.
