Dhjetëra banorë të njësisë administrative Cakran janë mbledhur paraditen e sotme në një protestë, duke kundërshtuar vendimin e qeverisë për zhvendosjen e disa shërbimeve publike drejt njësisë së Levanit.
Banorët shprehen se ky vendim vështirëson ndjeshëm jetën e përditshme, veçanërisht për të moshuarit, të cilët detyrohen të përshkojnë rreth 27 kilometra për të marrë shërbimet bazë administrative.
Sipas tyre, një pjesë e konsiderueshme e komunitetit nuk ka as mundësi dhe as aftësi për të përdorur shërbimet online, çka e bën edhe më problematike situatën e krijuar.
Banorët theksojnë se Cakrani është një zonë me identitet dhe histori të konsoliduar, e përbërë nga 13 fshatra dhe me rreth 17 mijë banorë. Ata e konsiderojnë të pajustifikuar bashkimin e shërbimeve me Levanin, duke kërkuar rishikimin e menjëhershëm të vendimit.
“Është e papranueshme që një komunitet kaq i madh të mbetet pa shërbime pranë. Kjo është një goditje e drejtpërdrejtë për banorët, sidomos për shtresat më të pambrojtura,” u shprehën protestuesit.
Banorët paralajmërojnë se reagimet e tyre do të vijojnë nëse institucionet nuk ndërmarrin masa për zgjidhjen e kësaj problematike.
