Në Gjykatën Kushtetuese, kolegji i përbërë nga relatori Sandër Beci, si dhe Sonila Bejtja e Marsida Xhaferllari, pritet të mblidhet dhe të vendosë për çështjen e Belinda Ballukut, zv.kryeministre dhe Ministre e Infrastrukturës dhe Energjisë, ndaj së cilës Gjykata e Posaçme ka caktuar masat e sigurisë pezullim nga ushtrimi i funksionit dhe ndalim për të dalë jashtë vendit.
Në Kolegj më herët ishte Olta Zaçaj, kryetare e Gjykatës Kushtetuese, e cila, për shkak të mbarimit të mandatit, u largua dhe u pasua nga Asim Vokshi. Ndaj në Kolegj hyri Marsida Xhaferllari, e cila ushtron dhe detyrën e kryetares derisa të zgjidhet kryetari i ri.
Këshilli i Ministrave ka kërkuar nga Gjykata Kushtetuese të pezullojë vendimin e gjykatës së Posaçme, me qëllim që znj. Balluku të rikthehet në detyrë derisa çështja të zgjidhet në themel.
Kolegji pritet të vendosë sot lidhur me këtë çështje.
Balluku është e para zv.kryeministre në detyrë e cila pezullohet nga detyra. Ajo është e pandehur për tenderin për tunelin e Llogarasë dhe nën hetim për tenderin Loti 4 Unaza e Madhe.
