Giuseppe Salvatore Riina, i njohur ndryshe si Salvuccio, djali i ish-shefit famëkeq të Cosa Nostra-s, Totò Riina, është rikthyer në qendër të vëmendjes pas një interviste të gjatë dhënë në Lo Sperone Podcast, ku foli hapur për figurën e të atit dhe për perceptimin e tij mbi mafian italiane. Ndryshe nga i ati, i cili kërkonte të qëndronte larg vëmendjes publike, Giuseppe Salvatore shfaqet shpesh provokues dhe i gatshëm të tërheqë debatin. Pas publikimeve në rrjetet sociale me tone dashurie për babanë e tij dhe ankandit të portreteve të tij, Riina i ri nuk ngurron të mbrojë figurën e Totò Riina-s, i dënuar me dhjetëra burgime të përjetshme për krime mafioze dhe atentate.
“Babai im nuk urdhëroi kurrë vrasjen e Giuseppe Di Matteo-s së vogël. Kur u vra Giovanni Falcone, ai nuk ishte më problem për Mafian apo Totò Riinën, por për të tjerët pas kuintave”, deklaroi ai gjatë intervistës, duke marrë duartrokitje nga folësit e pranishëm.
Riina Jr. hodhi akuza të drejtpërdrejta edhe ndaj lëvizjes anti-mafia, të cilën e quajti një “karvan që kërkon vetëm vëmendje”, duke përmendur rastet e gjyqtares Silvana Saguto dhe sipërmarrësit Antonello Montante si shembuj të dështimit të figurave publike që shfaqeshin si mbështetës të anti-mafias. Përballë pyetjeve mbi të atin, ai nuk tregoi asnjë distancim apo pendesë. “Ai ishte një njeri i madh. Një person që gjithmonë luftonte sistemin. Serioz, i ndershëm, e mbante fjalën dhe mendonte për familjen e tij. Nuk e kam parë kurrë të kryejë një akt dhune ose të kthehej në shtëpi me armë në dorë dhe të mbuluar me gjak”, tha Giuseppe Salvatore, duke anashkaluar realitetin e dënimeve të shumta të Totò Riina-s.
Folësit e lanë të fliste gjatë, duke e lejuar të paraqiste imazhin e një Totò Riina të përkushtuar ndaj familjes dhe të paraqitur si viktimë e një sistemi të padrejtë. Sipas tij, babai i tij u arrestua vetëm sepse ishte një “bezdi” për ata që kishin pushtetin dhe paratë. “Ashtu si Bernardo Provenzano dhe Matteo Messina Denaro, edhe babai im u bë i panevojshëm në një moment, sepse nuk i shërbente më atij shteti që vërtet mbante në dorë paratë e mafies. Mafia e vërtetë nuk është në Siçili, por në Romë”, theksoi Riina Jr.
Në përpjekje për të krahasuar jetën e tij me përvoja të rënda ndërkombëtare, ai u ndal edhe tek fëmijët e Gazës: “Ashtu si palestinezët e vegjël, gjithmonë i kam përjetuar gjërat sikur të isha në një gjendje të vazhdueshme emergjence. Kur na duhej të iknim nga një strehë në tjetrën me babin, për mua ishte një festë sepse njihja vende dhe njerëz të rinj”, rrëfeu ai. Sipas tij, nuk ka qenë kurrë i izoluar, përkundrazi, edhe lindja e tij ka ndodhur në një klinikë të njohur të Palermos, “me emrin dhe mbiemrin e babait tim, që të gjithë e njihnin”.
Në intervistë nuk munguan as referencat për Giovanni Falcone dhe Paolo Borsellino, dy magjistratët e vrarë nga urdhërat e Cosa Nostra-s në vitin 1992. Por Riina i ri, duke përsëritur versionin e mohuar prej dekadash nga familja e tij, këmbënguli se babai nuk kishte lidhje me ato atentate. “Nxitësit ishin të tjerë, ndoshta dikush që donte të ndalonte hetimet mbi pastrimin e parave ose kontratat mafioze”, u shpreh ai, duke hedhur hije dyshimi mbi forca të tjera të shtetit. Deklaratat e Giuseppe Salvatore Riina-s kanë ngjallur reagime të shumta, duke rikthyer debatin mbi tentativat e disa trashëgimtarëve të mafias për të rishkruar historinë dhe për të rehabilituar figurat e errëta të krimit të organizuar italian.
