Avokati Ulian Barjami ishte i ftuar këtë mbrëmje në emisionin “Top Story” në Top Channel, vetëm pak orë pas lirimit të tij me urdhër të Prokurorisë. Ai deklaroi se arrestimi i tij ishte i paligjshëm dhe rrëfeu detajet e seancës së masës së sigurisë që u zhvillua të premten, ku mbrojti klientin e tij.
Barjami tregoi se seanca, e cila u zhvillua tre ditë pas arrestimit, ishte shumë e gjatë dhe përmbante mospërputhje të shumta në aktet e paraqitura. “Konstatova që asnjë nga aktet nuk përputhej me njëri-tjetrin,” tha ai, duke shtuar se gjykata po ashtu e vuri re këtë fakt.
Në seancë u paraqitën pamjet e kamerave të sigurisë nga lokali ku ndodhi ngjarja, të cilat, sipas avokatit, dëshmuan se klienti i tij nuk kishte kundërshtuar policinë, kundër akuzës së ngritur për këtë veprim. “U provua një skandal, nuk kishte vepër penale nga klienti im, por nga policia dhe prokuroria për procesverbalin e mbajtur,” deklaroi Barjami, duke theksuar se hetimet për këtë çështje vazhdojnë.
Avokati foli gjithashtu për reagimin e prokurorit gjatë seancës, i cili sipas tij kishte qëndrim agresiv dhe kërcënoi se arrestimi i tij ishte i paligjshëm dhe se nuk kishte atribut për ta arrestuar. Barjami tha se nuk do të heqë dorë nga ndjekja e çështjes, pavarësisht vendimit për lirimin e tij.
Ai përfundoi duke theksuar se nuk do të bëjë kallëzim ndaj kolegëve të tij dhe se nuk do të mbrojë klientë që kryejnë krime ndaj të miturve, duke respektuar parimet e tij profesionale.
