Autoriteti i Konkurrencës njoftoi ditën e djeshme se kishte gjobitur gjashtë kompani të shitjes me shumicë të fruta-perimeve, pasi kishin diktuar çmimet në dëm të fermerëve. Ndaj tyre, Konkurrenca ka vendosur gjoba deri në 0.15% të xhiros së vitit financiar paraardhës për secilën kompani.
Por hetimi i cili përveçse ishte i vonuar, duket se ka amnistuar tregun më të madh agro-ushqimor të Shqipërisë që ndodhet në Tiranë dhe që menaxhohet nga kompanisë EKMA, në pronësi të biznesmenit, Klodian Allajbeu.
Konkurrenca gjobiti gjashtë kompani të grumbullimit dhe shitjes me shumicë të fruta-perimeve në qarqet Tiranë, Elbasan, Berat, Fier dhe Korçë, por jo tregun monopol të kryeqytetit që mbledh sasinë më të lartë të prodhimit bujqësor të fermerëve vendas.
Për më tepër, kompania e Allajbut që administron Tregun Agroushqimor të kryeqytetit, 7 vite më parë u gjobit nga A.K. me një gjobë që kap vlerën e 430 mijë eurove, por që deri më tani përmbaruesit kanë arritur t’i marrin vetëm 24 mijë euro. Abuzimet në këtë treg nisën me vlerën e qirave, çmimin e dritave dhe të ujit që ishte shumë herë më të lartë se çmimi i vendosur nga UK dhe OSHEE.
Por pavarësisht kësaj historie, Autoriteti i Konkurrencës kësaj here qëndroi larg këtij tregu.
