Glories Nezaj, i cili konsiderohet si personi kyç i lidhur me arsenalin e armëve të zbuluar në Tiranë, rezulton me precedentë penalë të mëparshëm.
Në vitin 2023, ai u arrestua në kuadër të operacionit policor të koduar “Klienti”, në një lokal në rrugën “Isuf Elezi”. Gjatë kontrollit fizik, policia i gjeti armë dhe municion. Më herët, Nezaj ishte arrestuar edhe për kanosje me armë.
Ndërkohë, rreth 10 vite më parë, Klevin Çaushi u dënua së bashku me babain e tij për mashtrimin e Flamur Ymerit. Ky i fundit i kallëzoi babë e bir, duke pretenduar se ata i kishin marrë shumën prej 252 mijë eurosh përmes kontratave noteriale, me premtimin se do t’i investonin në blerjen e një fabrike në Bosnje. Sipas kallëzimit, paratë nuk iu kthyen asnjëherë.
Flamur Ymeri u bë mjaft i njohur për policinë dhe opinionin publik në atë periudhë, pas vrasjes me armë zjarri të dy të rinjve, Adnand Luli dhe Ervin Shaba, brenda banesës së tij. Për këtë ngjarje, Ymeri u dënua me 10 muaj burg.
