Ka marrë fund arratia e Ramadan Zotos, i njohur ndryshe si “Dane”, i shpallur në kërkim nga Policia e Shtetit pas plagosjes së dyfishtë të ndodhur në Sarandë gjatë muajit korrik.
Zoto akuzohet se, pas një konflikti të mëparshëm, plagosi me armë zjarri pistoletë dy shtetas nga Kamza, Gëzim Hajdaraj, 33 vjeç, dhe Ernest Lama, 25 vjeç. Ngjarja solli një hetim të gjerë dhe shpalljen e tij në kërkim kombëtar.
Mëngjesin e sotëm, strukturat e Policisë kanë finalizuar operacionin duke e prangosur në qytetin e Korçës, ku ai ndodhej nën shoqërimin e një personi të besuar, Arben Ismailaj. Të dy personat rezultojnë të kenë qenë më parë së bashku në një burg në Greqi.
Gjatë operacionit, u arrestua edhe Ismailaj, i cili ishte shpallur më herët në kërkim nga DVP Fier. Në datën 17 gusht 2025, gjatë kontrollit të ushtruar në banesën e tij në Fier nga strukturat e hetimit të DVP Vlorë në bashkëpunim me Drejtorinë e Forcës së Posaçme Operacionale Tiranë, policia zbuloi dhe sekuestroi një arsenal armësh.
Sipas njoftimit zyrtar të Policisë së Shtetit, në banesën e tij u gjetën:
një armë zjarri automatik model 56,
një silenciator,
dy pistoleta TT model 54,
një pistoletë model me kalibër të vogël,
si dhe një sasi e konsiderueshme municioni luftarak.
Për pasojë, ndaj Arben Ismailajt rëndon akuza për veprën penale “Prodhimi dhe mbajtja pa leje e armëve luftarake dhe e municionit”, ndërsa ndaj Ramadan Zotos, përveç plagosjes së dyfishtë, pritet të rëndojnë edhe akuza të tjera. Policia ka bërë të ditur se hetimet për këtë ngjarje vijojnë, me qëllim zbardhjen e plotë të rrethanave dhe lidhjeve të tjera të mundshme kriminale të dy të arrestuarve.
