Është arrestuar pas disa orësh 56-vjeçari me inicialet M. N. në Durrës, i cili dyshohet se ka plagosur me thikë vajzën e tij 24-vjeçare, për motive të dobëta.
Ngjarja ka ndodhur rreth orës 10:00, në lagjen nr. 12 të qytetit të Durrësit, ku 56-vjeçari dyshohet se e ka plagosur vajzën e tij me thikë në rrugë. Gjatë incidentit, ai ka goditur me thikë edhe një shtetas tjetër, O. M., i cili ka ndërhyrë për ta ndaluar në momentin e sulmit.
Të dy të plagosurit janë transportuar në spital, ku po marrin mjekim dhe ndodhen jashtë rrezikut për jetën.
Materialet procedurale i janë referuar Prokurorisë së Durrësit për veprime të mëtejshme, për veprat penale “Vrasja për shkak të marrëdhënieve familjare”, e mbetur në tentativë, “Vrasja me dashje në lidhje me një krim tjetër”, e mbetur në tentativë, si dhe “Prodhimi, mbajtja, blerja apo shitja pa leje e armëve të ftohta”.
