Në kuadër të operacionit ndërkombëtar “The Wanted”, policia spanjolle, në bashkëpunim me Interpol Tiranën dhe Interpol Madridin, arrestoi në Spanjë shtetasin shqiptar Juxhin Drazhi, 34 vjeç.
Ai ishte i shpallur në kërkim ndërkombëtar nga Gjykata e Posaçme e Tiranës, që në prill 2025 i kishte caktuar masën “arrest në burg” për trafikim të lëndëve narkotike, pjesëmarrje në grup të strukturuar kriminal dhe kryerje veprash penale nga organizatë kriminale.
Njoftimi i Policisë së Shtetit:
Vijon operacioni policor ndërkombëtar i koduar “The Wanted”, për kapjen dhe ekstradimin e shtetasve të shpallur në kërkim ndërkombëtar.
Shkëmbimi në kohë i informacionit mes Interpol Tiranës dhe Interpol Madridit vë në pranga një shtetas të kërkuar për veprimtari kriminale në fushën e narkotikëve.
Si rezultat i bashkëpunimit shumë të ngushtë të Interpol Tiranës me Interpol Madridin dhe policinë spanjolle, në kuadër të operacionit policor ndërkombëtar të koduar “The Wanted”, u krye arrestimi në Spanjë, me qëllim ekstradimin drejt vendit tonë, i shtetasit shqiptar J. D., 34 vjeç.
Ky shtetas ishte i shpallur në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar, Tiranë, në prill 2025, i ka caktuar masën e sigurisë “Arrest në burg”, për veprat penale “Trafikim i lëndëve narkotike”, kryer në formën e veçantë të bashkëpunimit, “Grupi i strukturuar kriminal” dhe “Kryerja e veprave penale nga grupi i strukturuar kriminal dhe organizata kriminale”.
Interpol Tirana, në bashkëpunim me Interpol Madrid/Spanjë, vijon bashkëpunimin për finalizimin e ekstradimit të këtij shtetasi drejt vendit tonë.
