Arrestohet në Spanjë një i shumëkërkuar i drejtësisë, i dënuar me 20 vite burgim për rrëmbimin e Ridvan Lamajt më 17 qershor 2015.
Bëhet fjalë për Adrian Ogiçin, 40 vjeç, banues në Sarandë.
“Ogiçi është i dënuar me 20 vite burg për kryerjen e veprave penale, Rrëmbimi i personit dhe Trafikimi i lëndëve narkotike, të kryera në bashkëpunim”, njoftoi policia. Ogiçi, në bashkëpunim me Vitor Islamin, rrëmbyen Ridvan Lamajn, të cilin e bënin përgjegjës për zhdukjen e një sasie droge që kishin trafikuar drejt Greqisë.
Nga hetimet rezulton se më datë 17.6.2015, rreth orës 17:30, i pandehuri Adrian Ogiçi dhe shtetasi A. K. kanë shkuar në banesën e të dëmtuarit Ridvan Lamaj, me qëllim për ta takuar. Aty kanë gjetur bashkëshorten e tij dhe e kanë pyetur se ku ndodhej Ridvani.
Ajo u ka thënë se i shoqi kishte dalë në Sarandë për kafe dhe me kërkesën e të pandehurit, ajo ka folur me të dëmtuarin me telefonin e kunatës së saj. Më pas ka folur edhe vetë i pandehuri Adrian Ogiçi dhe ata janë larguar.
Pas këtij momenti, i dëmtuari Ridvan Lamaj është takuar me të pandehurit Adrian Ogiçi dhe Vitor Islami, në shëtitoren e qytetit të Sarandës. I dëmtuari është futur në automjetin e të pandehurit Adrian Ogiçi, tip “BMW X5”, me targa 515 IY, ku është ulur në vendin e parë. Në vendin e shoferit ka qenë i pandehuri Adrian Ogiçi dhe në vendin e pasmë, pas vendit të shoferit, është ulur i pandehuri Vitor Islami.
Pasi kanë hyrë në makinë, të tre personat janë larguar nga qyteti i Sarandës. Të pandehurit Ogiçi dhe Islami, duke qenë të bindur që i dëmtuari Ridvan Lamaj ishte personi që kishte organizuar grabitjen e lëndës narkotike në Greqi, në shenjë hakmarrjeje kanë planifikuar dhe organizuar rrëmbimin dhe mbajtjen peng të tij.
Në momentin që i dëmtuari është ulur në vendin e parë të pasagjerit, i bindur se ishte thirrur për të diskutuar për problemet mes tyre dhe pa dijeni për planin e rrëmbimit, pasi janë mbyllur dyert e mjetit dhe makina ka filluar lëvizjen për t’u larguar, të pandehurit Adrian Ogiçi dhe Vitor Islami menjëherë kanë bllokuar lëvizjet e tij, duke i hequr lirinë me forcë, duke realizuar rrëmbimin e tij dhe duke i marrë telefonat celularë që mbante me vete. Ky fakt është provuar edhe nga bërtitjet dhe sharjet që persona të rastësishëm kanë dëgjuar në ato momente.
