Një shtetas shqiptar është arrestuar të dielën në Boyacá të Kolumbisë gjatë një kontrolli nga autoritetet e imigracionit. Sipas njoftimeve zyrtare, ai rezulton të jetë i kërkuar ndërkombëtarisht nga autoritetet italiane për përfshirje në organizata kriminale dhe trafik droge.
I arrestuari është identifikuar si Genti Krasniqi, i njohur si një nga bosët shqiptarë të heroinës dhe një nga më të kërkuarit nga policia italiane.
Hetimet ndaj tij nisën në vitin 2016, kur prokuroria e Milanos zbuloi se një apartament luksoz në qytet përdorej për fshehjen e ngarkesave me heroinë të ardhura nga Tirana. Apartamenti kontrollohej nga një çift – një grua italiane dhe një burrë shqiptar – që dyshohet se ishin të përfshirë në rrjetin e trafikut.
Krasniqi kishte udhëtuar nga Bogota drejt qytetit të Tunjës dhe u ndalua nga autoritetet teksa po përpiqej të kryente një procedurë në Zyrën Kolumbiane të Imigracionit. Dyshohet se ai kishte zgjedhur të lëvizte drejt Boyacá për të shmangur kontrollet më të rrepta në kryeqytet dhe në pikat e zakonshme të kalimit, duke menduar se Tunja do të ishte një vend më i sigurt për të qëndruar pa u zbuluar.
