Gëzim Taullaj, mjek imazherist në spitalin rajonal të Fierit, u arrestua nga policia, pasi dyshohet se merrte para pacientëve për t’iu bërë eko.
Ndaj 66-vjeçarit rëndojnë akuzat e “Shpërdorimit të detyrës” dhe “Korrupsionit pasiv të personave që ushtrojnë funksione publike”. Policia deklaroi se e kapi në flagrancë teksa merrte para një pacienti që do të bënte eko abdominale.
Sipas policisë, gjatë orarit zyrtar të punës, ai vizitonte pacientë në 2 klinika private në Fier dhe për këtë arsye dyshohet se ka shpërdoruar detyrën.
Pas arrestimit, policia ushtroi kontroll në banesën e mjekut, ku u gjetën shuma të konsiderueshme parash.
Njoftimi i policisë
“Si rezultat i administrimit të menjëhershëm të informacioneve se mjeku imazherist në spitalin e Fierit iu merrte para pacientëve për të kryer ekot, specialistët e Seksionit për Hetimin e Krimeve Ekonomiko-Financiare të Drejtorisë Vendore të Policisë Fier, organizuan punën në bashkëpunim me Prokurorinë Fier.
Për këtë rast, Prokuroria pranë Gjykatës së Shkallës së Parë të Juridiksionit të Përgjithshëm Fier, ka regjistruar procedimin penal nr.929 datë 01.07.2025, për veprën penale të dyshuar “Shpërdorimi i detyrës” dhe “Korrupsioni pasiv i personave që ushtrojnë funksione publike”, hetim i cili pas 4 muajsh u finalizua me arrestimin në flagrancë të shtetasit G. T., 66 vjeç, banues në Fier, me detyrë mjek imazherist në spitalin rajonal Fier.
Në vijim të veprimeve procedurale për këtë rast u sekuestrua si provë materiale, shuma e lekëve që 66-vjeçari i mori qytetarit, në kundërshtim me ligjin, si edhe shuma prej 1.857.000 lekë të reja, 39.155 euro, 2.370 paund dhe 75 dollarë që iu gjetën gjatë kontrollit të banesës”, thuhet në njoftimin e policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
