Policia e Tiranës ka arrestuar drejtoreshën e Ministrisë së Brendshme, Alma Bime, e dyshuar për kanosje ndaj një shtetasi të huaj dhe për djegien e orendive shtëpiake të ish-bashkëjetuesit të saj, Mareglen Tomori, në banesën e tij në rrugën “Hysen Xhura” në Kinostudio.
Sipas uniformave blu, Tomori, i cili zotëron një vilë trekatëshe në zonë, kishte punësuar një të huaj me leje qëndrimi për të kujdesur për katin e parë të banesës dhe për kopshtin. Bime dyshohet se më parë ka djegur krevatin në vilën e ish-bashkëjetuesit dhe më pas ka kanosur të huajin, duke e akuzuar për bashkëpunim me Tomorin dhe kërcënuar se do t’i hiqte lejen e qëndrimit.
Denoncimi është bërë nga vetë Tomori, i cili ka paraqitur edhe dëshmitë e punonjësit të huaj përmes mesazheve kërcënuese të Bimes. Hetimet për rastin vazhdojnë nga autoritetet përkatëse.
