Policia e Tiranës ka arrestuar një 39-vjeçar pas dyshimeve se ai dogji një automjet me vlerë rreth 100 mijë euro. Ngjarja ndodhi në orët e para të mëngjesit të së martës në rrugën “Memo Meto”. I arrestuari është identifikuar si Erges Shegani.
Sipas njoftimit të policisë, Shegani dyshohet se dogji mjetin e një 44-vjeçari për motive të dobëta. Pas njoftimit se rreth orës 03:30, më 9 dhjetor 2025, një automjet tip “Audi” në pronësi të shtetasit J.C., 44 vjeç, ishte djegur, shërbimet e Komisariatit Nr. 4 organizuan operacionin për identifikimin dhe arrestimin e autorit.
Policia njofton se falë veprimeve hetimore të shpejta dhe operacionit të koduar “Price”, autori u identifikua dhe u arrestua brenda pak orësh. Në cilësinë e provës materiale u sekuestruan edhe veshjet që i shërbenin Sheganit gjatë kryerjes së krimit.
Materialet procedurale janë referuar Prokurorisë së Tiranës për veprime të mëtejshme ligjore.
