Dy shtetas janë arrestuar nga policia në qytetin e Cërrikut, pas hetimeve për dy raste të ndara vjedhjeje të ndodhura gjatë javëve të fundit. Sipas burimeve zyrtare, një nga të arrestuarit rezulton të jetë person me precedentë penalë për vepra të ngjashme.
Njëri prej të ndaluarve është Xh. S., 35 vjeç, banues në Cërrik, i cili dyshohet se ka kryer disa vjedhje të njëpasnjëshme në një supermarket të qytetit. Sipas hetimeve paraprake, ai ka marrë produkte me një vlerë totale prej rreth 100 mijë lekësh të rinj gjatë një periudhe dyjavore. Burime nga Policia bëjnë me dije se ai është i dënuar më parë për të njëjtën vepër penale.
Rasti i dytë ka ndodhur më 12 shtator, kur një qytetar 62-vjeçar, identifikuar si A. H., denoncoi vjedhjen e telefonit të tij celular. Si i dyshuar për këtë ngjarje është arrestuar K. M., 31 vjeç, po ashtu banues në Cërrik.
Policia e Cërrikut njofton se hetimet janë ende në vijim për të zbuluar nëse të ndaluarit mund të jenë të përfshirë edhe në raste të tjera vjedhjeje në zonë.
Ndaj të dyshuarve janë përgatitur materialet procedurale, të cilat i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme ligjore.
