Gjykata e Vlorës ka vendosur masën e sigurisë “arrest në burg” për Hajri Bajramajn, 32 vjeç, i cili shkaktoi aksidentin tragjik ku humbi jetën adoleshenti Leandro Shametaj, vetëm 17 vjeç.
Trupa gjykuese pranoi kërkesën e Prokurorisë së Vlorës, që e akuzon Bajramajn për shkelje të rregullave të qarkullimit rrugor dhe drejtim të automjetit në gjendje të dehur. Gjatë seancës, i akuzuari u shfaq i penduar dhe kërkoi falje për ngjarjen.
Ndërkohë, jashtë gjykatës, familjarët e viktimës kërkuan drejtësi dhe dënim më të ashpër për autorin. Daja i Leandros tha se ngjarja nuk mund të konsiderohet thjesht aksident, por vrasje me dashje.
“Ne kërkojmë që të ashpërsohet ligji. Të ecësh me 200 km/h në bulevard, i dehur e pa përgjegjësi, kjo është vrasje e qëllimshme” u shpreh ai.
