Gjykata ka vendosur masën e sigurisë “arrest me burg” për Nikoll Radaçin, drejtuesin e mjetit që shkaktoi aksidentin fatal në Durrës, ku humbën jetën dy fëmijë dhe një tjetër mbeti i plagosur rëndë.
Ngjarja e rëndë ndodhi mesditën e 3 majit në lagjen nr. 15 të qytetit bregdetar. Sipas të dhënave, tre fëmijë po luanin me top në trotuar në momentin kur 57-vjeçari, i cili dyshohet se drejtonte mjetin në gjendje të dehur, humbi kontrollin dhe doli nga rruga, duke i përplasur.
Si pasojë e përplasjes së fortë, dy prej të miturve ndërruan jetë në vendngjarje, ndërsa një tjetër u transportua në spital në gjendje të rëndë shëndetësore.
Pas arrestimit, ndaj Radaçit u zhvillua seanca për caktimin e masës së sigurisë, ku gjykata vendosi izolimin e tij në burg, ndërsa hetimet për zbardhjen e plotë të rrethanave të aksidentit vijojnë.
