Një ngjarje e pazakontë ka ndodhur në Greqi, ku katër oficerë policie janë vënë në pranga me urdhër të prokurorisë, pas arratisjes së një të burgosuri turk në rrethana dramatike.
Sipas autoriteteve, i burgosuri po transportohej nga burgu i Korydallos drejt qytetit të Mytilenes me anijen e pasagjerëve “Ariadni”. Gjatë udhëtimit në zonën detare mes Kiosit dhe Oinousses, ai arriti të shpëtojë nga mbikëqyrja e policëve dhe, ndonëse i prangosur, u hodh në det.
Mësohet se i burgosuri po qëndronte i shtrirë në dyshemenë e tragetit nën mbikëqyrjen e katër efektivëve. Me një veprim të papritur, ai u ngrit me shpejtësi dhe përfitoi nga një moment i pakujdesisë, kur një qytetar hapi derën që të çonte në kuvertë. Kjo i dha mundësinë të arrinte në skajin e anijes dhe të hidhej në ujë.
I burgosuri ishte arrestuar më 7 korrik 2025 nga autoritetet portuale të Lesvosit për përfshirje në trafikim emigrantësh. Ai po dërgohej për një seancë dëgjimore në Mytilene. Menjëherë pas incidentit, kapiteni ndaloi motorët e anijes dhe nisi operacionin e kërkimit në bashkëpunim me Roja Bregdetare, por përpjekjet për ta lokalizuar rezultuan të pasuksesshme.
Hetimet janë në vazhdim, ndërsa policët përgjegjës për ruajtjen e tij tashmë po përballen me pasojat ligjore për këtë dështim të rëndë sigurie.
