Tetë zyrtarët e arrestuar pas arratisjes spektakolare nga spitali i Durrësit i Altin Ndocit, kanë shpërdoruar detyrën, pasi jo vetëm që nuk njoftuar drejtorinë e Burgjeve për vizitat e planifikuara mjekësore, por as policinë e Shtetit.
Kështu rezulton nga hetimet paraprake të SHCBA kryer në bashkëpunim me prokurorinë e Durrësit.
Në pranga kanë përfunduar zv.shefi i policisë së Burgut, Dezdemon Pazaj, kryeinfermieri, Aulon Quku, si dhe 6 policët që kanë bërë shoqërimin e Ndocit nga paraburgimit drejt spitalit.
“Me 13.01.2026, i paraburgosuri ka kryer konsultë mjekësore me mjekun e institucionit të vuajtjes së dënimit, i cili ka rekomanduar konsultë me mjek kirurg.Nga strukturat përkatëse të IEVP Durrës (shërbimi shëndetësor, policia e burgjeve, sektori social dhe ai ligjor) janë hartuar aktet përkatëse dhe është planifikuar shoqërimi për vizitë mjekësore në Spitalin Rajonal Durrës, sipas itinerarit: IEVP Durrës – Spital Rajonal Durrës – kthim në IEVP, brenda së njëjtës ditë.
I paraburgosuri është paraqitur në pavionin infektiv për marrjen e trajtimit mjekësor. Pas vizitës mjekësore nga mjeku kardiolog në Spitalin Rajonal Durrës, është rekomanduar mjekim dhe rikontroll pas 2 (dy) orësh”, njoftoi drejtoria e Burgjeve.
Nga hetimet rezulton se gjatë kohës që ka qenë duke marrë trajtim mjekësor, shtetasi Altin Ndoci ka kërkuar të shkojë në tualet.
“ Ai është shoqëruar nga punonjësit e Policisë së Burgjeve, por gjatë këtij momenti ka kundërshtuar dhe goditur punonjësit, duke arritur të arratiset”, thuhet në njoftimin e DPB.
Ndoci arriti t’i shpëtonte policisë së burgjeve dhe në parkim e priste një makinë që e largoj në drejtim të Spitallës. Ai nuk është arrestuar ende, pavarësisht kërkimeve të policisë.
Grupi hetimor po verefikon edhe urdhrat e trasferimit të tij nga 313 drejt paraburgimit të Durrësit para 5 vitesh, pasi një i paraburgosur me rrezikshmëri të lartë shoqërore, nuk mund të izolohet në një institucion të një sigurie të ulët.
Altin Ndoci po gjykohet në kuadër të procesit “Plumbi i Artë për vrasjen e Andi Zylyfit dhe plagosjen e Ardit Urucit. Ndërsa akuzohet për disa vrasje të tjera në kuadër organizatës kriminale të drejtuar nga Franc e Hajdar Copja.
Të arrestuar:
* Komisar Dezdemon Pazaj – Punonjës i Policisë së Burgjeve;
* Komisar Violeta Uka – Punonjëse e Policisë së Burgjeve;
* Kryeinspektor Dorjan Saraçi – Punonjës i Policisë së Burgjeve;
* Inspektor Sali Ferrollari – Punonjës i Policisë së Burgjeve;
* Inspektor Fatjon Braçi – Punonjës i Policisë së Burgjeve;
* Inspektor Preng Marvataj – Punonjës i Policisë së Burgjeve;
* Kryeinspektor Aranit Çela – Punonjës i Policisë së Burgjeve;
* Kryeinfermier Aulon Quku – Punonjës i IEVP Durrës.
Të pezulluar nga detyra:
* z. Indrit Cerloj – Drejtor i IEVP Durrës;
* z. Afrim Zeqiraj – Shef i Policisë;
* z. Dezdemon Pazaj – Shef i Policisë IEVP Durrës (i komanduar);
* znj. Ylfete Sema – Shefe e Shërbimit të Kujdesit Shëndetësor;
* z. Aulon Quku – Kryeinfermier;
* z. Dorjan Saraçi – Punonjës i Policisë së Burgjeve;
* z. Sali Ferrollari – Punonjës i Policisë së Burgjeve;
* z. Preng Marvataj – Punonjës i Policisë së Burgjeve;
* z. Fatjon Braçi – Punonjës i Policisë së Burgjeve;
* z. Idajet Calamaj – Punonjës i Policisë së Burgjeve;
* z. Aranit Çela – Punonjës i Policisë së Burgjeve;
* znj. Violeta Uka – Punonjëse e Policisë së Burgjeve.
