Është arratisur nga i burgosuri, Altin Ndoci, një nga emrat më të rrezikshëm të botës së krimit në vend dhe një prej të pandehurve të dosjes “Plumbi i Artë”. Ai ndodhej i shtruar në repartin infektiv të spitalit Rajonal të Durrësit.
I dënuari për 4 vrasje, dyshohet se pasi ka arritur të dalë nga dhoma e spitalit, duke i shpëtuar vëmendjes së oficerëve të policisë, ka ecur përgjatë itinerarit që të çon drejt varrezave të Durrësit.
Drejtoria e Përgjithshme e Burgjeve ka reaguar lidhur me ngjarjen në fjalë duke thënë se, pavarësisht ndërhyrjes së menjëhershme nga forcat e policisë, ai ka arritur të largohet nga spitali.
Deklaratë paraprake:
Paraburgosuri Altin Ndoci është larguar nga ambientet e Spitalit Rajonal të Durrësit, ku ishte shoqëruar për kryerjen e vizitave mjekësore. Të gjitha procedurat mjekësore janë zhvilluar në repartin e infektivit, i cili ka edhe repartin e sigurisë për të dënuarit.
Pavarësisht ndërhyrjes së menjëhershme nga forcat e Policisë së Burgjeve për ndalimin e tij, Altin Ndoci ka arritur të largohet nga spitali. Strukturat përkatëse janë vënë menjëherë në lëvizje dhe po punohet intensivisht për lokalizimin dhe kapjen e tij, si dhe për sqarimin e plotë të rrethanave të ngjarjes.
