Ndonëse reshjet e shiut kanë pushuar, banorët në disa zona të vendit vijojnë të përballen me përmbytjet, të shkaktuara nga rritja e prurjeve të lumenjve, veçanërisht në qarkun e Fierit dhe atë të Beratit.
Çarja e argjinaturës së lumit Seman ka sjellë dëme të konsiderueshme për banorët e fshatit Haskutras, në njësinë administrative Libofshë të Fierit. Sipas banorëve, përmbytjet janë pasojë e hapjes së portave shkarkuese të hidrocentralit të Banjës, çka ka rritur ndjeshëm prurjet e lumenjve Devoll dhe Seman, duke përmbytur zona të Kuçovës dhe Fierit.
Megjithëse ishin paralajmëruar nga autoritetet, banorët thonë se dëmet në banesa, bujqësi dhe blegtori janë të shumta, ndërsa situata është rënduar nga prurjet e vazhdueshme të lumit Seman. Forcat e policisë kanë njoftuar familjet që në orët e para të mëngjesit të largohen dhe të marrin masa për mbrojtjen e pasurive.
“Ishte policia sot në mëngjes dhe na paralajmëroi të largohemi dhe t’i ngremë mobiliet sa më lart që të mos i kapë uji. Pulat, po të dalin nga koteci, mbyten. Janë rreth 50–60 krerë. Më janë përmbytur rreth 27 dynym tokë”, shprehet një banor i zonës.
Ndërkohë, një tjetër banor tregon për dëme të mëdha në blegtori dhe bletari: “Tani nuk rregullohet gjë më. Më janë përmbytur 15 koshere me bletë dhe janë mbytur rreth 50 shpendë”.
Situatë e rënduar paraqitet edhe në fshatin Hinkë, në Bashkinë Dimal, ku lumi Seman ka dalë nga shtrati, duke përmbytur sipërfaqe të mëdha me sera, toka të mbjella dhe parcela me agrume. Kjo është hera e tretë brenda një muaji që kjo zonë përmbytet, ndërkohë që, ndonëse reshjet kanë dy ditë që kanë pushuar, prurjet e lumit vijojnë të mbeten të larta. Banorët ngrenë dyshime se situata lidhet me hapjen e portave të hidrocentralit të Banjës.
Më e rënduar situata paraqitet për kultivuesit e agrumeve, ku me qindra hektarë janë nën ujë, duke shkaktuar dëme të ndjeshme ekonomike. Fermerët kërkojnë ndërhyrje të menjëhershme nga autoritetet lokale dhe strukturat përkatëse për marrjen e masave mbrojtëse dhe për përballimin e pasojave të përmbytjeve.
