Gjykata e Apelit të Posaçëm vendosi të lërë në fuqi vendimin e GJKKO për dënimin me 2 vite e tetë muaj burg për ish-kryebashkiakun e Durrësit, Vangjush Dako. Sipas këtij vendimi Dako duhet të rikthehet në qeli, por avokati i tij, tha se i kanë mbetur vetem 10 ditë për të vuajtur pasi ai ka qëndruar 6 muaj në paraburgim dhe 13 muaj në arrest shtëpie. Për dy të bashkëpandehuritArdian Bulku dhe Fiqiri Farruku u la në fuqi dënimi me 2 vite burgim.
Vangjush Dako dhe të pandehurit e tjerë janë cilësuar fajtorë për akuzën e shpërdorimit të detyrës.
Dako u hetua nga SPAK lidhur me miratimin e lejes së ndërtimit në favor të shoqërisë Fakle sh.p.k, pasi ai dhe vartësit e tij i përpiluan dokumentet dy vjet pasi ndërtimi kishte përfunduar dhe banorët banonin në pallatin në fjalë.
Prokuroria e Posaçme e akuzon Dakon edhe për një procedurë prokurimi, për shërbim konsulence, sigurimin e një projekti të quajtur “Projektim zbatim për Promenadën Bregdetare dhe Plazhin publik nga Bërryli deri në Currila”. Sipas SPAK, komisioni i ngritur me urdhër të Dakos, ka kryer gabim llogaritjen e fondit limit, me një vlerë gati dhjetë herë më shumë se ajo që duhet të llogaritej në bazë të Vendimit të Këshillit të Ministrave.
Tri ditë më parë, në derën e një hoteli në pronësi të Dakos u vendos një sasi tritoli, e cila u shpërhye në mënyrë të kontrolluar nga policia.
