Gjykata e Apelit të Posaçëm ka vendosur këtë të premte të lërë në fuqi vendimin e dhënë më parë nga Shkalla e Parë për ish-shoferin e Ardi Veliut, Sokol Idrizaj, si dhe disa familjarë dhe bashkëpunëtorë të tij.
Agustin Mesuli, Altin Doda dhe Florian Baku u dënuan fillimisht me nga 11 vite burg, por përfituan ulje dënimi për shkak të gjykimit të shkurtuar dhe do të vuajnë nga 7.5 vite secili.
Sokol Idrizaj dhe bashkëshortja e tij, Elda Idrizaj, u dënuan me 8 vite burg, të cilat, pas përfitimit nga gjykimi i shkurtuar, reduktohen në 5.7 vite secili.
Egi Idrizaj, vajza e madhe e çiftit, do të vuajë 4.7 vite burg, ndërsa vajza më e vogël, Bora Idrizaj, është dënuar me 2 vite. Po ashtu, Tomorr Baruti u dënua me 2 vite, që i reduktohen në 1 vit e 4 muaj përmes gjykimit të shkurtuar.
Ndërkohë, Vangjush Kasharra është shpallur i pafajshëm për akuzën e "fshehjes së të ardhurave".
Sipas hetimeve, grupi dyshohet se ka transportuar sende të vjedhura dhe me vlerë të lartë nga Franca drejt Shqipërisë, të cilat më pas janë shitur në mënyrë të paligjshme përmes një argjendarie në Tiranë dhe përmes platformave online.
